O L'ALMANAC DE LA ROQUETIA.
Per dire tot çò de mancar pas dins lo rèire país clapassièr e endacòm mai, una pagina occitana que serà çò que ne faretz.
Nòvas de segur, mas tanben contes de ma grand-la-bòrnia, sornetas de ma tanta Nina de Niana, galejadas e bajocadas, pròsas e poesias, opinion, fòtos o vidèos,...
Acabatz de mandar.
cercle.occitan.max.roqueta@gmail.com

samedi 10 janvier 2015

Sèm Charlie

Mon paire, sèm montats a ta barba de flume
E èrem tantes que t'avèm fach cabussar en arrièr,
E ara mon paire siám sols e paures e entrepreses
Davant ton grand còrs espandit sens espèr
Ni que ton règne nos avenga
Ni que nòstra volontat siasca facha
Aicís ont aimàvem de viure.



Èra a morir de rire o èra a rire de morir,
Sabi pas. Alara avèm sautat dins una eternitat
De matèria, de sèxe, de violéncia sanissa,
Redonda coma lo matin quand recampa
Tot un pòble encolerat e coma
Mon pòble a ieu
Perfièchament inexistent encara.

(Ives Roqueta, Pater, Prefacia, Messa pels pòrcs, 4 Vertats, 1970)

dimanche 4 janvier 2015

Quina bona annada ?


Dins aqueles jorns que lo factor o l’internet nos pòrtan a carretada de sacadas de bons vòts, per nautres, a benlèu picada l’ora de venir metre una pelha de mai a la bugada e de nos bolegar !
Volèm pas mancar e èsser de rèsta e vos desiram doncas per aqueles quauques 360 jorns que nos demòran per n’acabar amb 2015 una bona fin d’annada, granada coma se deu, segur, mas quina annada vos desirar ? Quina…
1 De pas demorar tot sol
2 Un an doç coma de mèl
4 Per la lenga nòstra de plan vos batre.
6 (no coment)
7 De plan manjar per viure, vos vestir per la freg, e per beure, de pas esperar d’aver set !
8 E anatz pas solet al lièch. (de nuòch, per la rima en país bas).
9 Un an nòu polit coma un sòus,
10 amb d’amics coma los dets.
11 De plan èsser en camba,
12 per passar una bona Estivada en Avairon que se i lavan lo cuèu sens sabon.
16 De césers çò que cau mas plan onchats,
20 De vin sens aiga. Aquí òi !
50 Cinquanta que canten, cantan pas per ieu… que cau cantar per viure e viure per cantar.
51 nombroses, plan plaçats e plan quichats !
69 (pas que per los coquinasses) de botar de temps en quora son nas dins lo bartàs
70 en mai ta Tanta Nina !
83 Un apetís de quatre ventres.
88 De bombonas comolas,
89 E de crompar, aqueste an, un montamametas per la bèla maire, (mercé de contactar lo ceucle)
90 Mas de pas venir tròp lèu papeta, al pè de la platana de Sant-Guilhem, son pro per desparlar d'aquel que ven. Amen.

Enfin, vos desiram de vos enserranar sus de dralhòls polits lo mai sovent possible!