O L'ALMANAC DE LA ROQUETIA.
Per dire tot çò de mancar pas dins lo rèire país clapassièr e endacòm mai, una pagina occitana que serà çò que ne faretz.
Nòvas de segur, mas tanben contes de ma grand-la-bòrnia, sornetas de ma tanta Nina de Niana, galejadas e bajocadas, pròsas e poesias, opinion, fòtos o vidèos,...
Acabatz de mandar.
cercle.occitan.max.roqueta@gmail.com

samedi 18 août 2018

Acomolòfi




Acomolòfi lo traparetz tre la debuta dins lo Diccionari General Occitan dau paure Cantalausa (ed.Cultura d'Òc, 2003) que forcèt l'admiracion dau Sèrgi Gairal dins son prefaci. D'emplegar sens cap de moderacion per aqueles que fonhan davant "engorgament" per dire melhor que ràdio Trafic la realitat de las rotas d'uòi.

Me siái daissat dire que d'unes emplègan dins aquel sens "tap" mas me semble que "tap" es de servar per de causas mai nòblas. (M'avètz comprés!)

Cantalausa lo prepausa tanben, l'acomolòfi, per dire una oclusion intestinala per aqueles qu'aguèron pas l'astre de partir d'un miserere. Mas francament que ven faire Bison lo Finaudèl dins tota aquela tripalha.?

E ben es pas tan colhon qu'aquò, una cordelada de veituras engimbra una oclusion rotièira... subretot quand, coma a Niana, limitatz la velocitad a 08 km/h. (mercé Josiana)

Enfin, me fan remarcar que ne patissèm fòrça d'aqueles acomolòfis: administratius, politics, centralizators, çò pièger essent l'acomolòfi oploïc que nos tomba dessús d'aquela passa e que daissa passar pas que de petas per los pauròts associatius que son detràs! (mercé Albèrt)

Alara, se vos fasètz cagar dins los acomolòfis legissètz sus lo telefonet o la tauleta la Campana de Niana.