O L'ALMANAC DE LA ROQUETIA.
Per dire tot çò de mancar pas dins lo rèire país clapassièr e endacòm mai, una pagina occitana que serà çò que ne faretz.
Nòvas de segur, mas tanben contes de ma grand-la-bòrnia, sornetas de ma tanta Nina de Niana, galejadas e bajocadas, pròsas e poesias, opinion, fòtos o vidèos,...
Acabatz de mandar.
cercle.occitan.max.roqueta@gmail.com

mercredi 28 novembre 2018

Nadau Torn de 2018

Sonatz Campanetas, tòrna lo temps dau NADAU TORN e los de Sant Guilhem de préner mai lo camin, -se venètz pas a Sant Guilhem, Sant Guilhem vos vendrà veire- dau primièr dissabte de l'Avent a la Messa cantada de Mièja Nuòch, quane rambalh !  Vos dise pas ! 

Se. Vos o dise un pauc : partirem de Provença, que las cambas nos fan pas mal, amb Guilhaume, Tòni, Pèire, Micolau (Sabòli), de pastres dei montanhas o de pastretas, plan segur, montarem cap a la montanha negra amb una pauseta a Sant Pons, retorn per Lodèva, lo Puòget, lo Clapàs...
O avètz comprés, lo Nadau Torn es un viatge, e quin viatge : en cançons e dins la tradicion nòstra de Nadau; en tèrras e en lenga d'òc; en musica d'aquí aquel planponh de Nadalets acompanhats, e d'un biais requist, per Maria e Felip Carcassés e sos instruments tradicionals, contes e racontes, perqué fonhar son plaser? En mai, es a gratis.

La corala, la conoissètz. Pas d'a fons, qu'aqueste an, aprèp lo succès de l'an passat, avèm fòrça pichonat, se baton per venir cantar amb nautres: doas còlas de rugbi de XV, una de polidas, l'autra de mascles e aquò fa de rambalh ! Per parafrasar lo poèta: "Lo XV aquò òc !" 

Se tornam a Brissac per abenar quauque pauc lo desfibrilator crompat per la comuna, a grands fraisses, l'an passat, per repiutar las mametas que faguèrem s'estavanir, montarem puòi aqueste an sus lo causse de Pompinhan per veire se l'èr i sentís pas a esclaufit, farem pinchon a Gabian per i metre un pauc d'òli e nòstre gran de sau, enfin dedicarem au paure nòstre Janòt lo concèrt dau dimenge 23 dins l'abadiá que tant aimava, a Gelòna.
Alara, fasètz pas los piòts, venètz e seretz coma un buòu a la grèpia !
Dins l'espèra de vos veire (o pas) vos ofrissèm en document estacat  lo libreton de las cançons. Es pas polida la vida?



Brissac dins la glèisa, dissabte 1 de decembre, 18h00.
 Pompinhan, sala comunala, dissabte 8 de decembre, 18h00.
Gabian, dins la glèisa, dissabte 15 de decembre, 17h30.
Sant Guilhem dau desèrt,
dins l'abadiá, dimenge 23 de decembre, 15h. 
Concèrt omenatge au paure Janòt.
En ligam lo Nadau Torn de l'an passat en imatges, mercé l'Amada Cros de TéVèÒc, per vos faire lengueta.

samedi 3 novembre 2018

Calandreta La Garriga de Ginhac - 14 de Novembre - 19h


Ai d'aquela p... de pòsta occitana, lo paquet s'èra perdut.
Ja que lo lingüista refusava de se daissar manlevar, sèm pas aqueste an debonorièr, luònh se'n manca. Enfin, aqueste còp lo tenèm e amb el lo primièr talhièr descabestrat de la sason !

E dins la boèta boita (mèfi de parlar coma cau !) una call-girl dins un pastisson (mas non Renat ! Ai d'aquel Renat....),
dins la boita :
 
lo Florian Vernet !

Florian Vernet (Besièrs, 19 d'abril de 1941) es un lingüista, pedagòg e escrivan occitan. Foguèt professor d'occitan a l'Universitat Pau Valèri de Montpelhièr abans de prendre la retirada en 2006. Es tanben un dels membres de l'Academia Occitana-Consistòri del Gai Saber, a l'encòp del conselh lingüistic del Congrès Permanent de la Lenga Occitana e de l'Institut d'Estudis Araneses-Academia Aranesa de la Lenga Occitana.


  Academician de totas las Academias, Academia a el solet, Tresor dóu Felibrige de carn e d'òsses, Florian nos parlarà de lenga nòstra en lenga nòstra e vos porgirà, entre autras, la clau de la vinha !



19h, A LA CALANDRETA LA GARRIGA de GINHAC, camin de Carabòtas.*

 
e, coma de costuma, sopar partejat: "Venètz e portatz".  Qual de beure, qual de manjar, qual de dire, qual un pastisson amb una call-girl au dintre...


* PER TRAPAR LA CALANDRETA de GINHAC,  es camin de Carabòtas, còsta lo licèu agricòla.

A750 dusca a Ginhac, 1ra sortida (mèfi es missanta a 130 a l'ora) après lo pont sus Erau per los que davalan de Lodèva o que venon de Besièrs; 2nd sortida per aqueles que montan dau Clapàs. Arribatz dins una giradoira direccion Belarga, Canet, Montanhac en daissant Ginhac dins l'esquina. Un parelh de quilomètres, una autre giradoira. 1ra a drecha es lo camin de Carabòtas que vos cau davalar. Après lo licèu agricòla auretz la Calandreta aquí tocant.


Aquel qu'es pas content, que se crompe un GPS o que me sone 07 63 15 30 17...