Trofèu das bateires

Cronica dau tambornet

Lo Trofèu das bateires de 2013, organizat per lo Club de Balaruc los Banhs, a liurat son verdicte. Aquela competicion individuala, que pertὸca los sols utilizaires dau batedor, es unenca dins l’espὸrt tambornet.

Emai se los puristas regretèron l’abséncia de bateires qu’ofician al nivèl melhor, coma Joan Miquèl Barral o Marion Cazzani, lo trofèu mentiguèt pas.

Las esprὸvas s’encadenèron lὸng de la serada : mandadisses ras de la cὸrda sus una cibla plaçada al centre dau terrenh, mandadisses precises de luὸnh... A cada cὸp los dètz bateires presents avián drech a una pauma d’ensag, puὸi doas autras per capitar son melhor mandadís. Lo quichal sus las espatlas se sentissiá a cada ensag… La tièra d’esprὸvas se concluïguèt amb un mandadís sus una cibla plaçada a nautor mejana. Cada cὸp capitat valiá un cèrt nombre de ponches segon la dificultat.

A-n-aqueste jὸc son pas totjorn los mai grands o los mai fὸrts que ganhan, coma o provèt Loïc Houlès dau Tambourin Club de Viὸls-lo-Fὸrt. Amb 23 ponches marcats, siaguèt sacrat melhor bateire de l’esprὸva joves, mas sustot totas categorias. La diferéncia màger amb la categoria adulta èra una distància mai redusida per los joves.

Practica dau batedor

Aquel instrument un pauc estranh, utilizat pas que per lo servici, permet de porgir de velocitat e d’efièch a la pauma. Es redobtat das jogaires e empusa la curiositat dau monde que descobrisson l’espὸrt tambornet. Son emplec es pas obligatὸri.

La practica dau batedor es lo fruch d’un entrainament regular, que se fa lo temps de sesilhas especialament dedicadas per el, sesilhas d’entrainament lo mai sovent solitàrias…

Pendent los rescὸntres, per èstre plenament eficaces, los bateires sollicitan l’ajuda d’un amic que, al moment dau servici, se ten lèste per escambiar lèu-lèu batedor e tambornet, a fins que lo bateire pὸsque respondre en seguida a un retorn de pauma sus son servici. E d’unes jogaires biaissuts de l’equipa advèrsa o sabon faire…

L’aisina es compausada d’un margue de longor cambiadissa e d’un tambornet mai pichὸt plaçat al cap d’aqueste margue, que lo mai sovent es de fusta, mas la tecnologia a fach una dintrada remarcada dempuὸi mantunas annadas, e ara se vei espelir de margues de carbὸni o autras matèrias compositas.

Igòr Batsimba - Montpelhièr 04

Loïc Houlès al batedor