La Seccion Sautaròca de nòstras associacions (Corala e Ceucle –non, non, la farem pas la fusion amb la megapresidéncia, los gardacòsses, la lemosina de fonccion, (per los Innocents de Niana, la lemosina de fonccion es una veitura !), que nautres volèm pegar als pòbles...
Doncas, sèm pas partit que siái ja perdut,
la Seccion Sautaròca vos prepausa aqueste còp d’anar faire pinchon al Mas d’Agre, sos amètliers vièlhs, en passant per lo ròc mitic de la literatura nòstra, lo Ròc dau Miègjorn o de la Vinha (la Vinha dau Ròc per los Sautaròcs reborsièrs de Sant-Guilhem e aqueles qu’an legida La Campana de Magalouna).
Una caminada pro aisida, a l’entorn de 3h30 de marcha, anar e tornar, sens tròp de rapalhons per un còp, mas coma diriá lo filosòf de Seta, Alan Camelio, "un còp fa pas puta" !
De saupre, per los papetas o los cortalens, qu’una autra passejada, encara mens dificila -qué fariam pas per vosautres!- es prevista a l’entorn de Sant-Guilhem, lo 25 d’abriu, amb dins lo tantòst, la visita dau vilatge en occitan.
Recomandacion importanta per los afogats de politica (se n’i a encara…): Vos conselham d’anar votar per lo novèl cantonièr abans que de montar vos enserranar amb nautres talament luònh al dessús d'aquel rambalh uman que sètz pas segur d’i tornar puòi. De tot biais sètz pas segur de tornar tot cort.
lo dimenge 22 de març a 9 oras 45
(mercés d'èstre a l'ora !)
Rendètz-vos es donat sus lo plan de la cooperativa de Montpeirós..
Prene l'A750, aprèp Ginhac e lo pont dau Lengadòc, sortida Sant-Andrieu de Sangonís, anar a Montpeirós, la cooperativa vos arrèsta.
Nos recamparem aquí abans que de prene a partir de la D122, aprèp las Lavanhas, un camin peirós que nos portarà saique un pauc mai luònh.
De preveire solièrs montats, per se cobrir que l'èr amondaut sentirà pas a esclaufit, biaça d'esquina plan garnida de manjar e de beure. (l'asso. se carga dau tira-tap).
La passejada es evidentament a gràtis mas, segon la formula consacrada, jos la responsabilitat individuala de cadun.
Entresenhas per mèl o al 04 67 57 32 21. En cas de pluòja o de quicòm 06 28 27 57 73. Se lo temps es un pauc dobtós, que març marceja, daissarem un messatge dins las boitas mèls lo dimenge de matin al mai tard per dire se la pasejada es mantenguda o pas, çò melhor essent de telefonar.
A dimenge 22.
tota la còla de la Roquetia.
Aucun commentaire:
Enregistrer un commentaire