Sèrgi Viaule

Après un balèti de las valadas italianas a vos copar lo buf, (es mai qu'un biais de dire!) aicí sèm, aplanponham de las doas mans 2018.

Se'n tornan los cafès descabestrats  e o cau dire aquò fa gaug, la pausa siaguèt longueta, mai que mai que l'estrena de 2018 serà facha per lo Sèrgi Viaule, poèta, romancièr, contaire, cronicaire, militant de la plena pèl, critic retirat e criticaire de la Setmana, ... tot i fa ventre a aquel òme que davalarà pas que per nautres de sa Montanha Negra emmostachat, encapelat e encamionetat!

Serem, segur, aqueste 31 de genièr mai qu'una ponhada per ie faire bona aculhença e se l'escotar.

Cafè descabestrat a l'entorn de Sèrgi Viaule, 

dimècres 31 de genièr, 19h, 

calandreta la Garriga de Ginhac.

A partir de son darrièr libre, Una punhada de clavèls (éditions des régionalismes, 2017) Sèrgi nos parlarà de son trabalh d'escritura mas tanben nos farà una presentacion de la literatura d'òc contemporanèa, que s'a pas tot escrich lo tipe (e pasmens n'escriguèt causòtas!), a tot legit

19h, A LA CALANDRETA LA GARRIGA de GINHAC, camin de Carabòtas.

e, coma de costuma, sopar partejat: "Venètz e portatz".  

Qual de beure, qual de manjar, qual de dire...

Ajuda!  Serà lo primièr cafè de l'an e coma cada an vos vene ficar en caire amb ma crida per far dintrar un pauc de moneda dins la caissa comuna! Los cafès òcs e la màger part de nòstras activitats son a ren non cost -levat los balètis que la recèpta mesquina, pecaire! va tota als musicaires.Volèm manténer (a tot prètz!) aquela gratuitat. Faire pagar per parlar sa lenga, aquela empega!

Aquò mercé los convidats que totes jògan lo jòc e se desrengan a gràtis, que siagan aquí regraciats un còp de mai; mercé tanben Calandreta que nos aculhís encara e totjorn amistosament e per pas res dins sos locals. Pasmens, e mai bridem l'ase en limitant nòstras activitats e ambicions, avèm quauques despensas (fraisses de rota, mercejaments, assegurància, ICF, etc...) e son pas las subvencions que nos estofan. 

Avèm pogut, fins ara, téner pè a la bòla e defugir la quincanèla mercé Joanòt, l'amic Suedés que nos daissèt sos dreches d'autor; mercé tanben un parelh de donators anonims per quals LARGUESA es mai qu'un mot en occitan medieval sus un pergamin per mitat escafat. Mas o cau menar tris, se volèm pas finir a Magalona. (e pas a cò dels cuèus nuds!)  Alara, desoblidètz pas, vos prègue, de vos encartar per l'annada e de mandar un checonet de 10€ (cromparem pas jamai de bòrda!) o mai, au clavaire Joan-Claudi Gròs - Le pla - 34380 ARGELLIERS o encara melhor de venir amb vòstra bilheta au cafè de dimècres. (Pasmens, se cada matin vos arraca la cròta que cagatz, qu'aquò vos empacha pas de venir, sens la bilheta...)

Mercés per avança.