O L'ALMANAC DE LA ROQUETIA.
Per dire tot çò de mancar pas dins lo rèire país clapassièr e endacòm mai, una pagina occitana que serà çò que ne faretz.
Nòvas de segur, mas tanben contes de ma grand-la-bòrnia, sornetas de ma tanta Nina de Niana, galejadas e bajocadas, pròsas e poesias, opinion, fòtos o vidèos,...
Acabatz de mandar.
cercle.occitan.max.roqueta@gmail.com

samedi 13 juillet 2013

LA QUILHA d'AVAIRON O QUILHA DE UÒCH

La quilha de uèch, o quilha avaironesa, es una mena de bowling occitan, mas, segur, es mai polit que lo bowling... Lo brèç d'aqueste jòc tradicional de Roèrgue es Espalion. Aquí son istòria, rapidament : los jòcs de quilha èran fòrça espandits dins França al sègle dètz e nòu. Dins Roèrgue, èra fòrça popular, e se jogava ambé nòu quilhas. Dins lo ròdol d'Espalion, lo jòc a evoluït cap a sa forma actuala, que se fa ambé uòch quilhas. D'efièch,  dins lo ròdol d'Espalion los jogaires avián pres la tissa de « prene quilha », valent a dire de prene una de las nòu quilhas drechas per la tustar ambé la bola. Aquel jòc siaguèt codificat en 1912 per un grop d'avaironeses de Paris, a l'entorn de Josèp Airinhac. En 1936  la federacion avaironesa de quilhas crebèt l’uòu, e lo campionat d'Avairon, sonat Fanion, espeliguèt.
Vaquí lo jòc : aquò se passa sus un terrenh de tèrra batuda, de 30 mètres de long sus 6 de larg. I a uòch quilhas drechas, de boés de fau, de seissanta centimètres de nautor, plaçadas al fons dau terrenh. Cada quilha es blocada per un taquet, plantat dins lo sòl. Trobam tanben una bola facha de rasic de noguièr, que son pes es entre 4 e 7 quilòs. Una autra quilha, sonada lo quillon, dèu èstre mandada ambé la bola, i tornarem en seguida.
La partida se debana en nòu cops : tres a distància pichòta, tres a distància intermediària e tres a distància longa. Los emplaçaments per los lançars son clarament marcats per de « gabarits » de fèrre, de tres mètres de longor, plegats en escaire sus un mètre.
Cada quilha tombada val un ponch, e quora lo jogaire marca pas ges de ponch, se ditz qu'a fach una « bufa ». Un pauc l'equivalent de Fanny a la petanca. L'escòr maximom per una partida es ochanta ponches, mas lo recòrd actual, per una partida, es de seissanta uòch ponches, recòrd tombat lo 15 de junh de 1997, e detengut per Alan Pradel, licenciat a Rodés; doncas un recòrd ja un pauc vièlh, mas que ten lo còp. Un bon jogaire realiza una mejana de 50 ponches per partida. En competicion se comptabiliza siá los ponches dau jogaire, siá los de la còla (dobleta o quadreta).
Lo jòc : òm comença per un mandadís a un mètre de las quilhas : aquí lo jogaire manda la bola, un sol còp. Puòi aquò passa a cinc mètres de las quilhas : aquí a drech a dos mandadisses. Lo primièr còp, lo jogaire tusta lo quillon ambé la bola, e doncas es lo quillon qu'es mandat e non la bola. Al segond ensag lo jogaire manda la bola. Important : cal tombar obligatoriament la primièira quilha de la rengada dau mitan, una quilha sonada « la bona », sique non las quilhas abatudas son pas comptadas. Se lo còp es bon, lo quilhon es tanben comptabilizat. Doncas a cada còp se pot comptar al maximom 9 quilhas tombadas, las uòch plaçadas e lo quilhon, es a dire la quilha lançada ambé la bola.
En seguida òm jòga a 10 mètres : aquí avèm drech a tres còps. Lo primièr se fa coma a 5 mètres, en tustant lo quillon ambé la bola. E aquí se lo jogaire tomba al mens doas quilhas amb aqueste quillon, serà pas la pena de tombar « la bona » per validar los ponches.
Lo jòc contunha a 15 mètres, ambé dos ensages, totjorn en mandant lo quilhon per començar. Aquí una sola quilha tombada ambé lo lançar dau quillon esparnha de dever tombar « la bona » per validar los ponches.
Enfin lo darrièr lançar se fa a 20 mètres, ambé lo quilhon, e lo jogaire a drech a un sol mandadis.
La concentracion mai granda de clubs de quilhas de uòch es segur en Avairon, lor brèç, aqui n'avètz de detzenats, mas cal saupre que ne trobam tanben a Paris, Tolosa o Montpelhièr. Los jogaires son despartits en categorias segon lor edat, e das mai joves as mai vièlhs, se compta quicòm coma uòch categorias.

Generalament lo campionat de quilhas de uòch se debana a Espalion ; l'an passat èra lo 12 d'agost. Un siti internet es en servici, evidentament : www.quillesdehuit.org. Per acabar cal saupre qu'aqueste jòc, ancianament pas que mascle, es ara dobèrt a las femnas, ambé benlèu las bolas mai leugièras, e qu'al Clapàs lo terrenh es plaça Robèrt Schuman, barri Mosson.



vendredi 5 juillet 2013