O L'ALMANAC DE LA ROQUETIA.
Per dire tot çò de mancar pas dins lo rèire país clapassièr e endacòm mai, una pagina occitana que serà çò que ne faretz.
Nòvas de segur, mas tanben contes de ma grand-la-bòrnia, sornetas de ma tanta Nina de Niana, galejadas e bajocadas, pròsas e poesias, opinion, fòtos o vidèos,...
Acabatz de mandar.
cercle.occitan.max.roqueta@gmail.com

samedi 2 mai 2015

A jòc!

Amb la prima, emai banhada, la sason de tambornet tòrna començar, maudespièch la plòja que gasta fòrça rescòntres e que n’anullan d’autres…Las femnas, sustot, patisson  aquela situacion. La màger part de las partidas femeninas siaguèron reportadas. Mas dau costat de la categoria Erau 1, las equipas de Florensac e de Possan passèron entre las gotas, ambé mai d’astre, benlèu, per las de Florensac, que s’impausèron davant de possanesas que pasmens tenguèron la tèsta dau campionat ivernenc de tambornet en sala.
Dau costat das òmes, totjorn Erau 1, saludam lo prètz-fach polit de Sant Jòrdi d’Òrques que ganhèt mas en capitant un revirament complet de situacion fàcia a Jacó mentre que los de Sant Jòrdi èran menats a l’escòr pas luònh de la fin. Los jacomards empòchan pasmens lo bonús defensiu, que recompensa mens de tres jòcs d’escart  entre lo venceire e lo vencit (escòr finau 13 / 11). Victòria sarrada tanben per Cornonsec fàcia a una còla de Sant Joan de Cuculas pro valenta e nhacosa. En contra Usclàs d’Erau faguèt ges de present a una equipa un pauc vèrda dau Causse de la Sèla, mas qu’agèt lo meriti d’accedir a la categoria Erau 1. Pinhan, d'autre latz, s'impausèt au despens de Castelnau de Guèrs: 13 / 6. Enfin, los siblaires de Viòls lo Fòrt pòdon siblar de contentament, que per lo moment senhorejan en aquela debuta de campionat despartamentau…