O L'ALMANAC DE LA ROQUETIA.
Per dire tot çò de mancar pas dins lo rèire país clapassièr e endacòm mai, una pagina occitana que serà çò que ne faretz.
Nòvas de segur, mas tanben contes de ma grand-la-bòrnia, sornetas de ma tanta Nina de Niana, galejadas e bajocadas, pròsas e poesias, opinion, fòtos o vidèos,...
Acabatz de mandar.
cercle.occitan.max.roqueta@gmail.com

mardi 19 février 2019

Rebat d'una manif.

Capitada capitolesca d'un pòble qu'òm pensava qu'aviá capitulat ?
Lusida dins sas espèrras o espèr dins un recaliu que ven un còp de mai de se tornar abrandar?
Aicí sèm. Veirem çò que ne sortirà.

Tolosa, Òu !, Tolosa !


Mas la borra es cartejada, mercé lo CREO Miègjorn Pirenèus.



Se en doas setmanas lo moviment occitan, per un còp -qu'aquò se sap, un còp fa pas puta- unit, capitèt de mobilizar 3000 personas davant l'inadmissible quant seriam deman dins un "Anem Òc" repiutat -se lo nom vos destorba, lo podètz cambiar-  aprestat en amont de longa data dins un consensús indefugible ?
Que, qu'òm o vòlga reconóisser o pas, nos èran de manca aqueles recampaments reivendico-festius, nos fa mestièr, a nautres, los umils, de faire pòble, amassa, rics de nòstras diferéncias per tornar préner vòlha dins lo cada jorn militant ingrat e de còps tristonet ; quichar saique lo gargalhòl de l'escanaire e subretot bolegar coma cau los tocamanetas moligasses d'aquí ; per semenar l'agram sus la talvèra ont nos acantonèron e faire nàisser deman, coma o faguèrem dimenge, per de joves manifestants que descobrissián Occitània la bèla.
Pro dau replegament personal cadun dins sa capeleta, sa regionasseta, sa vilassa o sa vilòta, son sindicat, institut, partit, cercle, club amb son dialècte, sas edicions, sas publicacions, sa festoneta annadièira, son anar mesquin, son autosatisfaccion e son pichon confòrt.
Pro dels guirguilhs sens fins, Lengadòc centralizaire amb la region Occitanieta, Gasconha rebeluda, Provença separatista, Lemosin, Auvernha, Vivarés sus las marchas e a despart. Fasètz-la sus la luna se volètz, la manif venenta, mas fasètz la.
Poguèsson nòstres capolièrs ausir lo bram de Tolosa, far calar sos ègos e s'endevenir deman per portar quicòm de mai bèl, poguèssem totes faire país darrièr eles.

Que, s'abandonam la plaça publica de tròp lo lop (l'idra) de Montfòrt aurà lèu fach de tornar.
Mas dimenge 17, a Tolosa, çai venguèt la pèira ont èra mestièr.

Tolosa, Òc !, Tolosa !

 



 

Aucun commentaire:

Enregistrer un commentaire