A jòc!

Cronica dau tambornet

Grand-Prèmi de Montpelhièr Aglomeracion

Los garçons de Montpelhièr Aglomeracion e las filhas dau Grand Pic Sant Lop confirman.

Lo Grand-Prèmi d’Espὸrt-tambornet de Montpelhièr Aglomeracion, per lo primièr cὸp associat als Masters de Cornon, tenguèt totas sas promessas amb de rescὸntres fὸrça disputats onte cada jogaire defendèt las colors de son territὸri.

Lo rescὸntre entre las seleccions femeninas Montpelhièr-Aglomeracion e Grand Pic Sant Lop sonhèt particularament lo suspense. Montpelhièr Aglὸ semblèt pasmens dominar tre lo començament de la partida.

D’efièch, jos lo vam de Delfina Goud e Carὸla Ferrièr de Cornonsec, las localas prenguèron lo larg rapidament. Amb un escart de cinc jὸcs (8-3), lo rescὸntre èra largament a favor de l’Aglὸ. Mas, en seguida de mantuns cambiaments dins lo dispositiu, de reténer lo de Nadèja Charles e d’Anna Tomàs, de Nὸstra Dama de Londres, als pὸstes de fons, las clapassièiras perdèron lèu son avança. Las blavas e iranjas de l'Aglomeracion capitèron pasmens d’agandir primièiras lo dotzen jὸc (12-10). Mas, a quauques paumas de la victὸria, se faguèron rejόnher sus lo fiau per lo Pic Sant Lop (12-12). Mentre que jamai siaguèron menadas de tot lo rescὸntre, las femeninas de Montpelhièr Aglomeracion concedissián lèu lo jὸc decisiu a sas adversàrias dau Grand Pic. Es una segonda victὸria per aquela seleccion dau Pic Sant Lop, après la contra la seleccion Erau-Mediterranèa, en junh passat.

Los garçons de Montpelhièr Aglomeracion an, eles tanben, marcat lo cὸp. Après lor primièira victὸria sus lo Grand Pic, en junh, los ὸmes de Patrici Òm, seleccionaire de l’Aglὸ, engranjèron una segonda victὸria. Es la seleccion de la Comunautat de Comunas Valada d’Erau qu’a concedida la victὸria sus un escὸr de 13 jὸcs a 9. De notar lo pretzfach de Floran Palau, de Vendemian, au pὸste de tèrç das verds e blancs de la Valada d’Erau.

Aquela seleccion de la Valada d'Erau aculhirà Montpelhièr Aglomeracion per lo rescὸntre retorn sus lo terrenh de Ginhac lo 29 de setembre que ven dins l’encastre de la Tambouri’fête.

Las resultas das Grand-Prèmis d’Erau :

Grand-Prèmi dau Grand Pic-Sant-Lop (22 de junh a Sant-Matiu-de-Trevièrs)

Grand Pic-Sant-Lop Dὸnas 13-10 Erau-Mediterranèa Dὸnas

Grand Pic-Sant-Lop Òmes 4-13 Montpelhièr Aglomeracion Òmes

Grand-Prèmi Montpelhièr Aglomeracion (31 de julhet e 1èr d’Agost a Cornon)

Montpelhièr Aglomeracion Dὸnas 12-13 Grand Pic-Sant-Lop

Montpelhièr Aglomeracion Òmes 13-9 Valada d’Erau

Rescὸntre que ven das Grands Prèmis d’Erau :

Dins l’encastre de la Tambouri'Fête de la Valada d’Erau (29 de setembre à Ginhac)

Seleccions masculinas : Valada d’Erau – Montpelhièr Aglomeracion.