Monsur lo Comissari Europenc de l’Agricultura,
L’amic
Robèrt, que demòra en Bretanha, reçaupèt un chèc de 500.000 € de la part de
Brussèlas, per non far venir de porcèls aqueste an. Per aiçò, pensi de dintrar
dins lo programa de non-elevatge de porcèls per l’an que ven.
Aquò
qu’aimariái de saupre, es quina es la bòria possiblament melhora per non far
venir de porcèls e quina es la raça mai bèla de porcèls de non abarir.
Estimariái melhor non abarir de singlars, mas s’aquò es pas una raça bona de
non abarir, autant seriái content de non abarir de Landraça o de Large-White.
Lo
trabalh mai regde dins aquel programa sembla de téner alara un inventari
menimós del nombre de porcèls qu’avèm pas abarits. L’amic Robèrt es plen de
fisança en quant a l’avenidor de son afar. Faguèt venir de porcèls pendent mai
de vint ans, e çò melhor que posquèt cobrar, foguèt 20.000 € en 2008 ; fins a
aqueste an, que reçaupèt un chèc de 500.000 € per non aver abarits ges de porcèls.
... Se
me pòdi reçaupre un chèc de 500.000 € per dire de non far venir 50 porcèls,
alara, saique reçauprai 1.000.000 € per aver non abalits 100 porcèls... etc...
? Me propausi de començar a un nivèl pichon pichon, per capitar apuèi de non
abalir 4.000 porcèls ; aquò voldriá dire que reçaupriái un chèc de 4.000.000 € e
que, aital, poiriái investir dins un yacht.
Ara per
ara, quicòm mai : aqueles 4.000 porcèls que non farai venir non manjaràn
los 100.000 ferrats de milh que lor èran destinats. Saique, me cal compréner
qu’anatz pagar los agricultors per que non produguèsson (remiratz l’imperfach
del subjonctiu) lo milh ? Fin finala, me donariatz un quicomet per non
produsir los 100.000 ferrats de milh que non van apasturar los 4.000 porcèls
que non abalirai ?
Coma que
ne vire, aimariái plan de començar al mai lèu, que me sembla qu’aquel periòd de
l’an es mai favorable al non-abaliment dels porcèls.
Plan
sincerament e plan coralament,
Marcelon
de Borronhan.
PS : En
defòra d’aquò, me demandi se seriá possible de far venir vertadièirament un
planponh de porcèls, emai foguèsse acordat ieu dins lo programa de
non-abaliment, pas que per aver un pauc de cambajon per abalir la
familheta ?
Aucun commentaire:
Enregistrer un commentaire